KORONADAL CITY- Ginpagwa na sang Philippine National Police ukon PNP SoCot ang initial autopsy report sang 16-anyos nga dalagita nga nasapwan nga patay kag ginsulod pa sa sako sa banwa sang Banga, SoCot.

Sa esklusibo nga interbyu sang Bombo Radyo Koronadal kay Pol Major Jemuel Siason, Provincial Director sang SoCot PNP, ginpahayag sini nga suffocation ang rason sang nangin kamatayon ni Barbie Inocencio, ang isa ka Grade 10 student nga una na nga nareport nga missing kag nasapwan na lamang nga isa ka bangkay nga nagalutaw-lutaw sa isa ka irrigation canal sa Brgy Punong Grande sa nasambit nga banwa.

Kapulisan dili pa makumpirma kung gilugos ang 16 anyos ayha nakit-ang patay

Suno kay Siason, posible suno pa nga nawad-an sang hangin ang biktima sang ginsulod ini sa sako kag gingapos pa ang mga kamot.

Magluwas diri, ginpahayag man sang doctor nga nagsekyar sa biktima nga may laceration sa kinatawo sini nga nagapakita sang posibilidad nga ginlugos ini bag-o napatay.

Samtang, wala na sang iban pa nga ginatan-aw nga persons of interest ang PNP sa pagpatay sa dalagita kundi ang mismo nobyo sang iloy sini.

Ini ang bangud sa mga ebidensya kag imbestigasyon nga ila nga ginpatigayon nga nagatudlo kay Richard Gumulid, 31-anyos kag residente sang Kalawag 1, Isulan , Sultan Kudarat nga una na na nareport nga napatay makaligad nga ginhana suno pa sini nga habuyan sang granada ang operating team sang ginpadulungan ini sa ila nga puluy-an, butang nga ginpanginwala sang pamilya sang suspek.

Sa subong, ginahibalo man sang kapulisan kun matuod nga nagadala ang biktima base man sa naglapta nga classified documents sa social media.

Kaangot sini, nagpaandam man si Siason nga posible nga sang-atan sang kaso ang sinuman nga nagkuha kag nagpalapta sang impormasyon nga indi dapat suno pa nga isapubliko kag lunsay sa bahin lang sang PNP magpabilin bangud sa confedentiality sini ilabi pa nga nagapadayon sa gihapon ang imbestigasyon sa matuod nga natabo sa kamatayon ni Barbie.