KORONADAL CITY – Magadihon ang PNP sang isa ka special investigation task group (SITG) agud maimbestigaran ang pagpatay kay Sto Nino, South Cotabato Mayor Pablo Matinong Jr.

Ini ang ginkumpirmar ni Sto. Nino PNP chief of police captain Ian Bagot sa interbyu sang Bombo Radyo Koronadal.

Suno kay Captain Bagot, mangin kalakip sila sa nasambit nga SITG nga magatutok sa imbestigasyon sa kamatayon sang alkalde kun sa diin padayon ang pagkolekta nila sang mga ebidensiya nga magatumod sa mga suspek nga nagluthang patay kay Matinong.

Dugang sang kapitan, nakuha na nila ang kopya sang CCTV footage kun sa diin nakuhaan ang laragway sang riding-in-tandem suspects nga nagpalagyo makaligad ang pagluthang patay sa alkalde.

Samtang ginbuyagyag man ni Bagot nga duha ka semana ang nakaligad, ginpahayag ni Matinong sa flag-raising ceremony nga may yara suno pa sang duha ka tawo ang nagsulod sa ila puloy-an kag ginapangita siya.

Gilayon naman nga nagresponde ang iya mga kapulisan kag hatagan sang proteksyon si Matinong, apang gindis-ayrehan naman ini sang ulihi sa pahayag nga wala suno pa ini sang kasumpong ukon nakagarot.

Sa bahin naman South Cotabato 2nd District Representative kag Deputy Speaker for Mindanao Ferdinand Hernandez, nagapanawagan ini nga indi anay magpaguwa sang anuman nga pahayag nga mahimo makaapekto sa imbestigasyon sang mga kapulisan kag ipangamuyo na lamang si Matinong nga ginkabig niya nga abyan.

Ginpasiguro naman sang PNP-12 sa pagdumala ni Regional Director BGen. Michael John Dubria nga on top of the situation sila sa nasambit nga kaso.