KORONADAL CITY – Nagtukod na sang special investigation task group (SITG) ang North Cotabato Police Provincial Office kasunod sang pagmasaker sa 9 ka tawo sa banwa sang Kabacan, North Cotabato.

Ini ang ginpahayag ni North Cotabato Police Provincial Director Col. Henry Villar sa eksklusibo nga interbyu sang Bombo Radyo Koronadal, kun sa diin ginmandoan na sila ni PNP-12 Regional Director B/Gen. Michael John Dubria nga tutokan ang nasambit nga kaso agud maresolbar ini.

Suno kay Col. Villar, padayon ang pagkolekta nila sang mga impormasyon batok sa mga suspek kag ginahibalo ang motibo sa nasambit nga krimen.

Hugot man nila nga ginakondenar ang natabo kag ginpasiguro nga magapanabat ang mga naghimo sini.

Madumdoman nga nagabiyahe ang mga biktima sang ila mga motorsiklo sa bahin USM granary and machinery sa Brgy. Poblacion sa nasambit nga banwa sang hinali nga ginbalabagan sang mga armado nga suspek kag ginpangluthang.

Dead on the spot ang mga biktima nga sanday Kors Salilangan, Sandigan Zailon, Benladin Dimanalao, Romeo Balatamay, Katindig Kagayawon, kag Fahad Mandigan, lunsay mga residente sa banwa sang Kabacan; Budsal Lipusan sang Datu Odin Sinsuat, Maguindanao; kag Musaid Jaiden sa banwa sang Midsayap, North Cotabato.

Samtang napatay naman sa balay-bulolngan ang isa pa ka biktima makaligad mapilasan sa nasambit nga pagpangluthang.