KORONADAL CITY- Nagapatigayon na karun sang imbestigasyon ang Tacurong City PNP sa nagluntad nga pagpangluthang-patay sa isa ka retirado nga pulis sa syudad sang Tacurong sini nga aga lamang.

Sa ekslusibo nga interbyu sang Bombo Radyo Koronadal ginkilala ang napatay nga si ret. SPO2 Sebastian Pauya Parcon, 60 anyos residente sang Brgy. Baras Tacurong City kag duha ka tuig pa lamang ang nakaligad sang magretiro sa serbisyo.

Nahibaluan nga magapamalengke kun tani ang biktima sang pag-abot sini sa Prk. Daisy Brgy. New Isabela, gilayon ini nga ginluthang sang wala pa matumod nga mga suspek.

Nakaangkon naman ini sang igo sang bala sa iya nga ulo nga nangin tunaan sang gilayon sini nga kamatayon.

Samtang suno naman sa pamilya sang biktima, wala suno pa sila sang ihibalo kun sin-o ang posible nga nagpatay sa ila nga amay kag wala man sila sang ihibalo kun may death threats ini nga nabaton rason nga blangko sila sa matuod nga motibo sang krimen.

Nahibaluan nga nangin myembro si ret. SPO2 Parcon sang Sultan Kudarat PNP sa sulod sang 32 ka tuig kun sa diin ang mga kabataan sini ang lunsay mga myembro man sang PNP.