KORONADAL CITY– Nagapaayo na sa balay bululngan ang isa ka pulis makaligad maluthangan sang nagbisita sa puluy-an sang iya nga ex-girlfriend sa Brgy, Ganatan, Arakan, North Cotabato.

Sa impormasyon nga ginpalab-ot sa Bombo Radyo Koronadal, ginkilala ang biktima nga si Patrolman Chris Manuel, 30 anyos, single kag residente sang Antipas, NoCot nga naka destino sa Cotabato Provincial Mobile Force Company (CPMFC) sa Amas, Kidapawan City samtang ang suspek amuh si Ryan Amor, 30 anyos, security guard kag residente sang Amas, Kidapawan City.

Nahibaluan nga ginbisita suno pa sang pulis ang iya nga ex-girlfriend pati ang apat ka tuig nila nga bata sang maabtan ini ni Ryan Amor nga amuh naman ang kasamtangan nga nobyo kag live-in partner sang iya nga ex-gf.

Posible suno pa nga nagpanghimon ang suspek rason nga nahimo sini ang pagpangluthang usar ang kalibre 45 nga armas luthang kag naigo sa duha ka hita ang pulis nga gilayon naman nga gindangat sa balay bululngan.

Sa karon kasamtangan pa nga ginapangita ang suspek makaligad magpalagyo matapos himuon ang krimen.

Nagapadayon sa gihapon ang imbestigasyon sa nasambit nga panghitabo.