KORONADAL CITY- Ginpahayag ni PNP Chief General Oscar Albayalde nga nagakadapat nga ma improber ang Peace and Order sa syudad sang Koronadal.

Sa ekslusibo nga interbyu sang Bombo Radyo Koronadal kay PNP Chief Albayalde, indi dapat pabay-an sang mga Koronadaleños ilabi na sang kapulisan sa syudad nga maguba ang kaanyag sini bangud lamang sa kinagamo.

Ini makaligad ang pagpamomba sa Christ the King Cathedral nga gintunaan sa pagkapilas sang 2 ka persona kag ang pagka detonate sang isa pa ka ginbilin nga Improvised Explosive Device sa 747 establishment.

Una na nga ginatudlo nga Bangsamoro Islamic Freedom Fighters ang may kahimuan sa nasambit nga insidente.

Madumduman nga kahapon nga adlaw personal nga ginbista sang PNP chief ang syudad kaupod sanday PRO 12 Director Chief Superintendent Marcelo Morales, South Cotabato Police Provincial Director Senior Superintendent Nestor Salcedo, Koronadal City PNP chief Ronald Allan Peñaverde kag iban pa nga mga opisyal sang Koronadal kag South Cotabato.