SURALLAH, SOUTH COTABATO – Natalana nga ipaidalom sa stress debriefing ang pito ka menor de edad nga nakasaksi sa makasiligni nga masaker sa tatlo ka miyembro sang pamilya sa Prk. Lambukon, Brgy. Canajay, sa banwa sang Surallah.

Sa interbyu sang Bombo Radyo Koronadal kay Jimmy “Ebod” Castigador, tuman ang trauma nga nabatyagan subong sang mga bata makaligad makit-an ang pagpatay sini sa ila lolo Benedicto kag lola Japelina mangin man sa bata nila nga si Victoria.

Ginsakripisyo suno pa ni Japelina ang iya kaugalingon agud makadalagan pagguwa ang mga bata sa kahadlok nga maulamid sila sa kaakig sang suspek nga may dala nga gunting.

Samtang, ginlaragway naman ni Castigador nga kasubong nga pagapanitan suno pa sang buhi sang mga himata sang biktima ang iya bayaw kag suspek nga si John Jobert Donis makaligad ang ginhimo sini nga krimen.

Apesar nagahinulsol na si Donis sa iya ginhimo, desidido sa gihapon ang iya mga himata nga pasakaan ini sang kaso nga multiple murder bangud sa krimen nga iya ginhimo.

Nahibaluan nga hubog kag paranoid suno pa ang estado sang suspek sang ginhimo sini ang pagpatay sa mga biktima.