KORONADAL CITY- Ginatudlo nga suspek subong sa brutal nga pagpatay sa 41 anyos nga negosyante kag Engineer nga si Nidalyn Rendon amo ang pila ka mga trabahante sa iya nga hardware.

Madumduman nga kagab-i brutal nga ginpatay si Engr. Rendon sa sulod mismo sang iya nga puluy-an sa Prk. Malinong, Brgy. Benitez, Banga South Cotabato.

Sa ekslusibo nga interbyu sang Bombo Radyo Koronadal sa bayaw sang biktima nga si Richie Bagorio, ginsaysay sini ang sitwasyon sang iya bayaw kag ang crime scene kun sa diin posible sa kusina nag-agi ang mga suspek makaligad matukiban nga may grills nga pwersahan nag ginguba sa bahin sang iya kusina.

Pila sa mga trabahante ni Engr. Nidalyn Rendon, ginatudlo nga suspek sa brutal nga pagpatay sa iya

Dugang pa sini nga posible nagbato pa si Engr. Rendon sa mga suspek rason nga tuman ka damo pa nga dugo ang naglapta sa kusina sang puluy-an.

Nakaangkon sang nagkalain-lain nga buno sa lawas ang biktima samtang nahanog naman ang ulo, mata kag bibig sini nga posible ginbunggo sang mga suspek kag nakaangkon naman sang dako nga pilas ang kamot sang biktima tuga sang kutsilyo.

Engineer Nidalyn Rendon

Ginhangyo sang pamilya sang biktima nga i-hold ang tanan nga mga lalaki nga trabahante ni Engr. Rendon agud nga mahatagan sang ligwa ang imbestigasyon makaligad nga nakaangkon suno pa sang komprontasyon si Engr. Rendon kag ang pila ka mga trabahante sini sa iya hardware bangud sa pagpangawat sang mga semento antes pa man ang natabo nga krimen.

Nahibaluan nga si Engr. Nidalyn Rendon ang isa ka single mom sa iya bata nga babaye nga naga eskwela sa syudad sang Davao kag naga-isahanon lamang ang biktima sa ila puluy-an sang matabo ang krimen.

Sa karon padayon ang imbestigasyon sang Banga PNP sa pagpanguna ni Police Major Joseph Forro.