KORONADAL CITY – Ginpaagi sa hublag protesta sang pila ka mga mangunguma sa rehiyon 12 ang ila kasamtangan nga kahimtangan sa isyu sang barato nga presyo sa pagbaligya sang ila humay.

Ginareklamo sang mga ini ang P12-P15 kada kilo nga presyo sa pagbaligya sang humay apang tuman naman kamahal nga balor kun bugas na ang ginabaligya.

Makit-an sa mga placards sang mga ini ang ila kalain sang buot kun sa diin ila ginapasibangdan ang Rice Tariffication Law kag apela nga patas-an ang ila mga subsidiya.

Farmers line up the streets while carrying placards appealing to address the cheap price of selling palay for P12-15. (credits to the owner)

Kaangot sini, ginpakigbahin naman ni City and Provincial Agriculture and Fisheries Council Chairperson Roy Moreno sa interbyu sang Bombo Radyo Koronadal nga kakulangon sa mga pasilidad labi na sa mga dryers ang ginalantaw nga rason ngaa indi maayo ang kalidad sang mga humay rason nga barato suno pa ang humay nga ginabaligya.

Gani ginapanawagan niya sa gobyerno labi na sa Department of Agriculture nga tutokan ang problema nga ginapangatubang sang mga mangunguma agud makabawi naman ang mga ini.

Sa bahin naman sang talatapan sang National Food Authority, ginpasiguro nila nga dyutay ang pagapangayoon nila nga mga requirements agud indi na mabudlayan pa ang mga mangunguma sa pagbaligya sang ila mga humay.