KORONADAL CITY – Indi man malikawan sang pila ka Kuwaiti employers nga mangakig sa pagpangmaltrato nga ginhimo sang babaye nga amo ni Jeanelyn Villavende.

Sa ekslusibo nga interbyu sang Bombo Radyo Koronadal kay Teresa Navarromargate, isa ka OFW sa Kuwait kag tumandok sang Iloilo, luyag man sang pila ka mabuot nga agalon nga luguson, latiguhon kag bitayon tubtob sa mapatay ang babaye nga amo ni Villavende agud mabatyagan niya ang nabatyagan sang iya “kadama”.

Pamatuod sini suno kay Navarromargate, nangin emosyonal pa ang iya babaye nga amo sang makit-an ang mga posts angot sa total deployment ban kag mga OFW nga ginamaltrato bangud kun ano kadako ang ila pag-atiman sa ila nga kasubong ginakabig na sila nga pamilya, may iban naman nga mga employer nga tuman kapintas sa ila mga kabulig.

Gin-ako man sini nga nagakabalaka ang iya ginaatiman nga tigulang nga babaye nga employer kun ano na ang matabo sa ila kun pwersahan sila nga pabalikon sa Pilipinas bangud sa natabo kay Villavende.