KORONADAL CITY – Napuno sang emosyon ang kapitolyo sang probinsya sang Sultan Kudarat makaligad gindala ang haya didto sang isa sa mga lima ka PDEA-ARMM agents nga napatay sa ambush sa banwa sang Kapai, Lanao del Sur.

Ginsugata sang mga emosyonal nga mga katapu sang PDEA-12, provincial government kag mga residente ang bangkay ni agent Laurice Joy Amar pag-abot sini sa kapitolyo.

Gin-istorya man ni Sultan Kudarat Governor kag Regional Peace and Order Council chairman Sultan Pax Mangudadatu ang pamilya kag ginpasiguro ang bulig kag katarungan sa PDEA agent.

Hustisya naman ang singgitan sang mga himata kag pamilya sang biktima kag nagapanawagan sila kay Pangulong Rodrigo Duterte nga buligan sila nga maangkon ini.

Sa subong temporaryo nga nakahaya ang bangkay ni Amar sa provincial government samtang ginaplastar pa ang iban nga mga pano para kay Amar.

Madumdoman nga sakay sang van ang mga PDEA-ARMM agents kag duha ka PNP personnel sang gin-ambush sang mga rebelde nga grupo.