-- ADVERTISEMENT --

KORONADAL CITY – Ginbawian sang kabuhi ang isa ka pastor matapos nga mainvolbar sa isa ka aksidente sa national highway, Purok Crismos, Barangay Saravia, Koronadal City.

Ini ang ginpahayag ni Staff Sergeant Semirvidor Namoca, traffic investigator sang Koronadal City PNP sa interbyu sang Bombo Radyo Koronadal.

Ginkilala ang napatay nga si Pastor Roger Calinao, 66 anyos nga residente sang Purok Maharlika, Barangay Saravia, Koronadal City.

Naguwa sa imbestigasyon sang traffic section nga nabunggo ang motorisklo nga ginamaneho ni Calinao sa isa ka SUV nga ginapanag-iyahan sang Pag-IBIG Fund Koronadal kag bangud sa kabaskugon sang impact nagtabog ini kag nakaangkon sang tuman nga head injury.

Nahibaluan nga nag-overtake ang SUV sa ginasundan sini nga salakyan kag wala sini makita ang isa pa ka motorsiklo nga yara sa unhan sini rason nga gin-agaw niya ang pihak nga lane kag sang nagdugay nagbalik man apang nagapadulong na ang motorsiklo nga ginamaneho ni Calinao rason nga nabunggo sini ang nalikod nga bahin sang salakyan.

-- ADVERTISEMENT --

Gikan suno pa si Calinao sa Tupi kag padulong sa siyudad sang Koronadal samtang gikan naman sa Koronadal padulong sa Gensan City ang SUV nga ginamaneho ni Angelito Gorgonio Zurita, 46, may-asawa, kag residente sang Agan North, Barangay Morales, Koronadal City.

Gindapa pa sa South Cotabato Provincial Hospital si Calinao apang wala na ini naluwas pa.