KORONADAL CITY – Nagasinggitan sang hustisya kag pursigido ang mga himata sang napatay nga biktima bangud sa pagkarambola sang 4 ka motorsiklo nga naga-drag racing sa Barangay Carpenter Hill, Koronadal City, nga magpasaka sang kaso batuk sa mga suspetsado.
Nagaguwa sa imbestigasyon nga paliko na sa Prk. Pag-asa si Danilo Biclar, 55 anyos, kag pintor sa isa ka pribado nga sementeryo apang hinali ini nga nabunggoan sang Raider motorcycle nga ginamaneho naman ni Johnrey Olanday, 20 anyos, kag residente sang Prk. Maunlad, Brgy. Saravia.

Sa eksklusibo nga interbyu sang Bombo Radyo Koronadal kay Jonalyn Biclar, hinablos sang napatay nga biktima nga si Danilo Biclar, kinahanglan nga manabat ang mga suspek sa ila ginhimo labi na nga bangud sa ila iresponsable nga pagpalumba, napatay ang ila himata.
Ginpakigbahin man sini nga isa ka mabuot nga tawo ang biktima kag masami nagapauli sa Prk. Pag-asa sa kada matapos ang iya nga obra.

Dugang ni Biclar, nakahibalo sila nga may nagapatigayon sang drag racing sa ila lugar apang wala nila ginalauman nga mismo nga himata nila ang mabiktima diri.


Nahibaloan nga kalakip sa mga nag-intra sa drag racing amo sanday: Johnrey Olanday, 20 anyos, kag residente sang Prk. Maunlad, Brgy. Saravia; Alyas Reg, 17 anyos; Johnpaul Acozar, 19 anyos nga residente sang Tupi kag Nico Pitogo, residente sang Prk. Ilang-ilang, Brgy. Saravia.


Samtang, aminado naman ang barangay council sang Brgy. Carpenter Hill nga isa sa mga dako nila nga problema subong amo ang pagpatigayon sang pila ka mga salawayon nga mga indibidwal, labi na ang mga kabataan, sa pag-intra sa drag race.


Suno kay Brgy Kapitan Benedicto Pastera, ini ang ila nga ginasolbar sa sini nga mga tinion labi na ang nasambit nga sahi sang karera ang magaresulta sa indi maayo nga sitwasyon nga mangin kabangdanan pa sang pagkapilas ukon kamatayon sang mga nalamita diri, ukon sang iban nga mga persona nga wala sang labot sa nasambit nga karera.


Sa subong kasamtangan nga ginapangita ang tatlo nga iban pa nga nagpalagyo pagkatapos sang insidente samtang nagsungka na ang isa sa ila.