KORONADAL CITY – Tuman ang kasubo sang pamilya sang isa ka 3 anyos makaligad ini nga nasapwan nga wala na sang kabuhi makaligad nalumos sa banwa sang Tantangan, South Cotabato.

Ginkilala lamang ang nasambit nga biktima nga si alyas Goygoy, kag residente sang Brgy. New Iloilo sa nasambit nga banwa.

Suno kay Brgy. New Iloilo kapitan Benhur PeƱol sa interbyu sang Bombo Radyo Koronadal, nagatabok lamang suno pa si Goygoy sa dalan, butang nga ginsaway ini sang mga concerned citizens.

Nagkahangawa naman ang mga ginikanan sini sang nadula ang ila bata samtang nagahampang suno pa sa suba gani nagpatigayon sang pagpangita ang mga kaingod.

Nasapwan na lamang nila ini takna alas 5 sa hapon sa bahin sang Brgy. Dumadalig nga wala na sang kabuhi ang bata.

Nagpromisa naman si Mayor Benjamin Figueroa nga pagasabton ang pagpalubong sa nasambit nga biktima.

Pahanumdom na lamang sang barangay kapitan nga bantayan ang ila mga bata agud indi masulit ang nasambit nga trahediya.

Samtang, tubtob sa subong indi sa gihapon makapati ang mga ginikanan sang 3 anyos nga bata nga sa hinali lamang madula na ini sa ila kabuhi.

Sa eksklusibo nga interbyu sang Bombo Radyo kay Ginang Cristine Pran, iloy ni alyas Goygoy, iya kuntani niya nga pailisan sang nakit-an niya ini nga nagahampang apang tuman kasako ang iya ginahimo sadto nga mga tinion rason nga wala niya natalupangdan ang iya bata.

Tuman naman ang iya nga kabalaka kag kahadlok sang nadula ang iya bata kag labis ang iya pagtalangison sang nasapwan ang bangkay sini sa Brgy. Dumadalig sang narekober ini sang mga barangay kag rescue officials.

Sa pihak nga bahin nagpadamgo suno pa ang iya bata kun sa diin nakit-an nila si Goygoy nga nagahigda sa kahilamonan.

Sa ulihi, nagpahayag ini sang pagpasalamat sa Tantangan LGU kag sa mga netizens nga nakahangop sa ila masubo nga sitwasyon. Plano nga ilubong si Goygoy sa Maibu Cemetery makaligad ang haya sa ila panimalay.