KORONADAL CITY- Nagpagwa sang hibubun-ot ang isa pa ka mangunguma angot sa gina alegar sini nga indi suno pa patas nga paghatag sang Loan Program sa mga mangunguma nga apektado sang kontrobersyal nga Rice Tarrification Law nga nagatuga sang manubo nga baklanay sang palay sang mga local farmers.

Sa interbyu sang Bombo Radyo Koronadal kay alyas Allan sang Brgy. Kibid, Norala SoCot, ginakwestyon sini kun nga-a pili lamang kag limitado ang maka avail sang loan program para sa mga mangunguma sa pihak sang promisa suno pa ni Department of Agriculture Secretary William Dar nga tanan nga mga mangunguma ang makabenepisyo dire ilabi na ang mga rice farmers.

Samtang kaangot sini nagpahayag man si alyas Allan nga nagabayad suno pa sila sang ila membership sa isa ka organisasyon bilang mga mangunguma apang wala sila nalakip sa listahan suno pa sang DA nga sarang maka avail sang loan program.

Samtang wala man sini malikawan nga ikumparar ang kasamtangan nga administrasyon sa nakaligad nga administrasyon kun sa diin mas ginahatagan suno pa sang importansya ang mga mangunguma sang tion ni anay Pres. Ferdinand Marcos samtang sa mga nagsunod nga mga administrasyon kasubong ginpabay-an suno pa ang mga local farmers.