-- ADVERTISEMENT --

KORONADAL CITY- Nagresulta sa kamatayon sang isa ka myembro sang New People’s Army ukon NPA ang natabo nga engkwerto sa tunga nila sang militar sa banwa sang Tupi, South Cotabato.

Ini ang ginkumpirmar ni Lt. Col Jones Otida, Batallion Commander sang 27th IB Phil Army sa interbyu sang Bombo Radyo Koronadal.

Suno kay Otida, pasado alas 12:30 kaina sang kaagahon sang nagluntad ang nasambit nga engkwentro sa tunga sang kasuldaduhan kag Guirella Front 73 sang NPA nga ginapamunuan suno pa ni Kumander Kidlat sa Sitio Bangi, Brgy Lunen sa nasambit nga banwa.

Nagdugay sang halos 30 minutos ang bayluhanay sang lupok sang magtimbang nga bahin kag nag-atras ang armado nga grupo kun sa diin narekober sa encounter site ang 2 high powered firearms nga ginalakipan sang M14 rifle kag M653 rifle, ammunitions kag iban pa nga dokumento.

Ginpahayag man ni Otida nga ang nasambit nga engkwentro ang resulta sang suporta sang mga residente nga indi na luyag sa gamo kag presensya sang grupo nga padayon suno pa nga nagapang-recruit sa mga kabataan kag IP Community sa lugar.

-- ADVERTISEMENT --

Sa karon, nagapadayon ang focused military operation sang 27IB batuk sa mga nakapalagyo nga mga NPA.