KORONADAL CITY – Nagbubo ang emosyon sa lubong ni Jeanelyn Villavende sang gindul-ong ini sa iya ulihi nga palahuwayan sa Brgy. Tinago, Norala, South Cotabato.

Kasubong nga nag-ugyon man ang magal-umon nga paniempo sa nabatyagan sang mga nakakilala kag pamilya ni Villavende nga nagatalangison sa nadangtan sini sa iya lubong.

Mangin ang mga estudyante kag nilibo nga mga tawo halin sa nagkalain-lain nga mga lugar sang rehiyon 12 ang nakigbuylog sa kasubo sang mga himata sang biktima kun sa diin nagahaboy sila sang bulak sa dalan sa pag-agi sang convoy.

Ginpangunahan naman ni Fr. Chito Suganob ang funeral mass nga ginhalad para kay Jeanelyn sa Our Lady of Immaculate Concepcion church.

Wala man nalikawan nga ipakigbahin sang lola sini nga si Gloria Panes ang iya nabatyagan kaangot sa masakit nga nadangtan sang iya apo.

Sa interbyu sang Bombo Radyo Koronadal kay Panes nga anay OFW man sa Jeddah, Saudi Arabia, tuman suno pa ka-brutal ang ginhimo sang babaye nga employer sa iya apo makaligad mahibaloan ang masubo nga balita.

Ginpakigbahin man sini nga bangud sa ginakabig nga Villavende case, naluoy ang iya anay employer kay Jeanelyn kag nahuya man mismo ang iban nga Kuwaiti employers bangud sa kahimoan sang ila mga kasimanwa nila sa aton mga domestic helpers, labi na nga “haram” ukon pagdumili sa ila ang magpatay.

Sa pihak sini, nagapasalamat sila kay Pangulong Rodrigo Duterte bangud wala ini nagpabaya sa ila kahimtangan, kadungan sa pagduso nga indi nila pagabatunon ang blood money nga igatanyag sang mga employers ni Villavende.

Nakasulat sa mga puti nga t-shirt sang mga nagapangasubo nga pamilya ang pila sa mga mensahe kasubong sang “Justice for Jeanelyn Villavende” kag “We will miss you, Tata”.