KORONADAL CITY – Ginpasiguro sang National Food Authority ukon NFA South Cotabato nga padayon ang ila nga pagbakal sang palay halin sa mga local farmers sa probinsya.

Sa esklusibo nga interbyu sang Bombo Radyo Koronadal kay Nelson Sañada, Officer in Charge sang NFA South Cotabato, padayon nga nagabakal sang palay sa kantidad nga P17.00 per kilo ang ahensya halin sa mga local farmers sa probinsya.

Ginpa-athag man ni Sañada, nga kun individual farmer ang magbaligya sa ila, may dugang man suno pa nga P3.00 para sa buffer stocking incentives, P0.20/kg para sa Drying fee kag P0.20/kg para naman sa delivery fee kag ini ang baklon sa presyo nga P20.40/kg samtang dugang naman nga P0.30/kg para naman sa coop development incentive fee kun magahalin ang ibaligya nga palay sa Cooperatives ukon Associations kag kun pagasumahon ini ang mangin P20.70/kg.

Magluwas suno pa sini, may yara man sang ginapanagtag ang Department of Agricultire nga non-monetary incentives sa mga mangunguma.

Makabaton suno pa sang 1 ka sako nga abono ang local farmer nga makadeliver sang 30 sako sang palay; 1 ka sako sang seeds para sa 50 bags sang palay kag 1 naman sa solar light ang ihatag sa cooperative nga magadeliver sang 1000 bags sang palay.

Ginplaro man ni Sañada nga 1st come 1st serve ang mangin basis sang nasambit nga mga insentibo bangud limilitado lamang ini.