KORONADAL CITY – Kanselado na ang pagsaulog sang Chinese New Year sa pungsod China bangud sa coronavirus issue.

Ini ang ginpahayag sa Bombo Radyo Koronadal ni Hannah Publico Makilan, isang OFW sa Hainan, China kag tumandok sang Lake Sebu, South Cotabato.

Photo credits to the owner

Suno kay Makilan, ginhimo sang Chinese government ang nasambit nga tikang agud indi maglapta ang nasambit nga balatian.

Nakalock-down man suno pa ang ginasiling nga sentro sang virus nga Wuhan kun sa diin ginlaragway sini nga tanan nga tawo ang nakasuksok na sang face mask.

Photo credits to the owner

Hugot man ang ginapatuman nga monitoring sa airport labi na sa arrival area kun sa diin gina-monitor sa thermal scanner ang mga nagaabot nag mga pasahero agud mahibaloan kun may virus ang mga ini.

Gin-abisuhan man sila sang Chinese government nga magpabilin nga alerto kag gilayon idangat sa ospital kun may yara sang mga sintomas sang coronavirus.

Sa subong masobra 20 ka tawo na ang napagkit nga patay samtang kapin 900 na ang nakumpirmar nga kaso sang coronavirus ang napagkit sang mga otoridad.