KORONADAL CITY- Ginkumpirma sa Bombo Radyo Koronadal sang isa sa mga designer ni Miss Universe 2018 Catriona Gray nga si Jearson Demavivas nga may legal na nga kasugtanan sa karun angot sa pagpreserba kag pagbutang sang national costume ni Gray sa national museum.

Sa ekslusibo nga interbyu sang Bombo Radyo Koronadal kay Demavivas nga naghalin sa South Cotabato kag isa sa mga designers sang national costume ni Miss Universe Catriona Gray, dako nga kadungganan nga mabutang sa national museum ang espesyal nga bayo sang beauty queen makaligad ang maragtason nga koronasyon sa nasambit nga beauty pageant.

Kun madumduman nga ang headdress ni Gray sa iya nga national costume ang Tboli inspired, ang iya naman nga belt ang ginhimo sa Tboli brass samtang ang sapatos sini ang may Tnalak kag manobo patterns sa kolaborasyon sang designer nga si Jojo Bragais.

Nahibaluan nga ang national costume ni Gray ang nagaisahanon nga national costume nga nagapakita sang maragtas sang Luzon Visayas kag Mindanao ukon bug-os nga Pilipinas.