KORONADAL CITY – Ginaimbestigaran na sang 6th Infantry Division Philippine Army kaupod ang PNP kag iban pa nga law enforcement agencies kun ano nga grupo ukon sin-o nga mga indibidwal ang responsable sa pagsigabong sang isa ka improvised explosive device sa Brgy. Poblacion Shariff Aguak, Maguindanao.

Una sini, ginpahayag sa Bombo Radyo Koronadal ni 6th ID spokesperson Major Homer Estolas nga hinali nga nagsigabong ang isa ka IED nga ginsulod sa utility box sang isa ka motor sa tupad lamang sang isa ka internet cafe kahapon sang aga.

Maayo na lamang nga wala sang may napilasan ukon napatay sa nasambit nga insidente.

Ginahibalo na sang mga otoridad kun ano ang motibo ukon target sa panibag-o nga insidente sang pagpasigabong sang bomba.

Sa pihak sini, ginpasiguro man sang opisyal nga ginahimo nila ang ila ikasarang agud matapna ang pagtuga sang kalakasan sang mga terror group kag masiguro ang kalinong sang Central Mindanao.

Nahibaloan nga nakumpiskar sang 6th ID pinaagi sa 57th Infantry Battalion ang mga IED paraphernalia kag war materials sa bahin sang Barangay Inadalan, Shariff Saydona Mustapha, Maguindanao.