KORONADAL CITY – Ginbuyagyag sang isa ka domestic helper sa pungsod Kuwait nga daw kasubong nga auction ang ginahimo sang pila ka mga Agency kag Kuwaiti employers agud nga pillion ang ila nga mga kadama nga magaserbisyo sa ila nga mga puluy-an.

Kaangot sini, ginpakigbahin sa Bombo Radyo Koronadal ni Susan Dubria, isa ka OFW sa Kuwait nga daw kasubong nga negosyo suno pa ukon “ukay-ukay” ang lantaw sang mga Kuwaiti employers sa ila bilang mga domestic helper.

Suno sa panaysayon ni Dubria, nagbiya siya sa una nga amo kun diin nagpati siya nga igabalik sa iya nga ginhalinan nga agency apang ginbaligya siya kag ginbakal suno pa sang 800 Kuwaiti Dinar (KD) sang lain nga ahensiya.

Gindugang pa sini nga ginkulbaan siya sang ginbakal sang bag-o nga employer nga wala niya makilala bangud wala siya sang agency na nga pagabalikan kag sukton agud maluwas siya sa tion nga maltratuhon.

Ini ang rason kun ngaa nga nagbalik siya sa ahensiya kag ginakibot naman sini ang pagbakal sa iya sang 800 KD.

Makaisa ka bes naman siya nga ginpasibangdan sang iya amo nga nagdula sang yabi sang puluy-an sini apang bangud maisog siya magsabat nagbato ini kag ginhan-ay ang iya kinamatarong.

Rason nga ginalaygayan niya ang mga may plano nga magpadulong sa abroad nga dapat maisog ang buot kag mangin maalam sa pag-atubang sang abuman nga sitwasyon agud nga indi maabuso.