KORONADAL CITY – Ginkilala na sang Western Mindanao Command ang mga biktima nga ginbawian sang kabuhi sa makahalanusbo nga pagtibusok sang chopper sa Basilan.
Ini makaligad ginpahanugotan na sang Philippine Air Force nga isapubliko ang pangalan sang mga nagkalamatay nga mgabiktima.
Suno kay Lt. Col. Alaric Delos Santos, ang tagpamaba sang Wesmincom sa interbyu sang Bombo Radyo Koronadal, ginkilala ang mga ini nga sanday Maj. Jessie Miller sang Capas, Tarlac nga amo ang piloto sang S-76 Sikorsky Air Ambulance; 1Lt. Mack R. Ferrer nga na-assign sa Villamor Airbase kag amo ang co-pilot; kag ang duha ka crew sini nga sanday SSgt. Miguel BaƱas sang Lipa City, Batangas; kag Benedict Tolial Jr nga tumandok sang Zamboanga Sibugay.
Suno kay Lt. Col. Delos Santos, nagapadayon pa ang imbestigasyon sang mga otoridad kag sang SOCO angot sa natabo kun sa diin isa sa mga ginalantaw nga mga anggulo amo ang malain nga paniempo nga kabangdanan suno pa sang pagtibusok apang ginalantaw man ang iban nga mga rason sang insidente.
Nagalaum ang opisyal nga indi na maliwat pa ang nasambit nga natabo labi na nga ini ang una nga kaso sang pagtibusok sang rescue chopper.
Kun madumdoman nga nagikan sa Zamboanga City ang nasambit nga helicopter agud i-airlift ang mga pilason nga suldado sa nagluntad nga Jolo twin blasts sadtong nakaligad nga bulan sang Agosto sang nagtibusok ini sa Barangay Upper Manggas malapit sa plantasyon ni Mayor Nasser Abubakar.