KORONADAL CITY – Direkta nga ginpabati-batian ni City traffic management office head Danilo Asong, ang pila ka mga tricycle drivers kag mga motorista bangud sa indi pagtuman sa laye sa trapiko.

Suno kay Asong, ginakabig niya nga mga “mango” kag mga “dungol” ukon wala sang tinun-an ang pila sa mga driver nga padayon nga nagalapas sa traffic rules.

Sila man suno pa ang may gana nga magpangakig kun pagasitahon sila bangud sa ila nga mga paglapas.

Dugang pa ni Asong, kinahanglan nga ipaidalom liwat sa seminar kag orientation ang salawayon nga mga driver bangud kasubong nga wala man sila nakabalo sa trapiko ilabi na sa traffic signs.

Ginkumparar man sini ang probinsya sang Maguindanao sang nadestino siya didto kun sa diin nagatuman ang mga tawo didto sa laye sang trapiko didto.