TACURONG CITY– Posible nga magpatawag sang imbestigasyon ang Department of Interior and Local Government ukon DILG 12 sa mga barangay kapitan sang Tacurong City, Sultan Kudarat makaligad magwa ang impormasyon nga halos tanan suno pa nga kapitan sa nasambit nga syudad ang investor sang Network Marketing Corporation investment scam.

Nahibaluan nga makaligad mapaslawan nga makahatag sang pay-out ang founder sang NMC nga si Esperidion “Jun” Sanchez nagreklamo ang mga constituents sang Brgy. Rajah Muda, Tacurong City batok sa founder mangin sa half-brother sang founder nga si Pastor Allan Binatil kag ang ila kapitan nga si Doray Pauya.

Sa interbyu sang Bombo Radyo Koronadal kay kapitan Pauya, ginpanginwala sini nga isa siya ka benefactor sang NMC bangod siya mismo ang nagganyat lang suno pa nga mag invest sang P1 million bangud nasaksihan sini ang aktwal nga pagpay-out sang isa sa mga investors.

Samtang suno naman kay alyas Alfred isa sa mga investors sang NMC investment scam, dapat may palanabton ang kapitan bangud mismo sa barangay hall ginapatigayon ang pagpay-in.

Una naman nga ginpahayag sa Bombo ni kapitan Pauya nga halos tanan suno pa nga kapitan sa Tacurong City ang mga investors sang NMC investment scam kag bangud sini, poible ipatawag sila sang DILG makaligad ginkunsinte ang nasambit nga aktibidad.