KORONADAL CITY– Gina-istoryahan subong sa syudad sang Koronadal ang pagpakasal sang magnobyohanay sa sulod sang ospital.

Nahibaluan nga masami ginapatigayon ang seremonya sang kasal sa sulod sang simbahan apang lain ang natabo sa magnobyohanay nga sanday Cristine Pama sang Brgy. Caloocan, Koronadal kag Orlando Corpuz sang Brgy. Dumadalig, Tantangan, South Cotabato makaligad ang mga ini nga ginkasal sa sulod sang South Cotabato Provincial Hospital.

Sa ekslusibo nga interbyu sang Bombo Radyo Koronadal kay Cristine, orihinal nga nakatalana ang ila kasal sa Disyembre 28, 2019 apang ginpadalian ini bangud kritikal na ang kondisyon sang iya iloy nga si Presentacion Pama na nga kasamtangan naka confine sa Provincial Hospital.

Luyag suno pa nila masaksihan pa sang iloy ang ila kasal bangud ang iloy sini ang pinaka excited para sa ila wedding day.

Ginkasal sila ni Koronadal City Mayor Eliordo Ogena samtang nagsirbe man nga ninong ang isa ka konsehal sang syudad nga si Councilor Bert Hinay.
Mangin memorable suno pa para sa mag-asawa ang ila kasal kaupod ang ila pinalangga nga iloy.