KORONADAL CITY- Ginalagas sa gihapon sang mga otoridad ang mga isa ka suspek sa pagpamuno sang kaugalingon sini nga utod sa Brgy. Maltana, Tampakan, South Cotabato.

Sa impormasyon nga ginpalab-ot sang mga otoridad sa pagpanguna ni PSI Rafael Banggay Jr. hepe sang Tampakan PNP nag-ugat ang krimen bangud lang sa tunga-ay sang idik kun sa diin nakaangkon suno pa sang mainit nga argumento sa telepono ang suspek nga si Johnny Bermejo Superficial, 39 anyos kag residente sang nasambit nga lugar kag ang biktima nga si Susan Bermejo Superficial.

Bangud sa indi paghangpanay, ginsulong ni Johnny ang puluy-an sang utod sini nga si Susan kag pag-abot sa puluy-an sini gilayon nya nga ginbuno sa wala nga dughan ang biktima.

Gilayon naman nga gindangat sa South Cotabato Provincial Hospital si Susan apang gindeklarar na ini nga dead on arrival sang doktor kun sa diin gilayon naman nga nakapalagyo ang suspek sa wala pa mahibaluan nga direksyon.

Sa karun nagapakig-angot na ang PNP sa iban pa nga mga himata kag kakilala sang suspek nga posible ginapanaguan sini.