KORONADAL CITY – Natalana na ang lubong sang ginpatay nga Overseas Filipino Worker (OFW) sa pungsod Kuwait nga si Jeanelyn Villavende nga residente sang Barangay Tinago, Norala, South Cotabato.

Sa ekslusibo nga interbyu sang Bombo Radyo Koronadal kay Ginang Nelly Padernal, tiya ni Jeanelyn, naistoryahan na sang ila pamilya nga igalubong ini sa palaabuton nga Enero 23, 2020 sa Norala Public Cemetery.

Apang, bag-o ini igadul-ong sa ulihi nga palahuwayan isa anay ka misa ang igahalad sa biktima sa Immaculate Concepcion Church sa nasambit nga banwa.

Kaangot sini, nagapasalamat man ang pamilya Villavende sa bulig nga ginhatag sang gobyerno kag ang simpatiya nga ginapakita sang mga katawhan kay Jeanelyn.

Apang, nag apela ang pamilya kay Presidente Rodrigo Duterte nga pasabton man ang Kuwaiti Government kag indi lamang ang employer ni Jeanelyn bangud sa mali nga autopsy report nga ginpaguwa sang mga ini kun sa diin lain naman ang naguwa sa re-autopsy nga ginhimo sang NBI makaligad nga makapauli sa pungsod ang bangkay ni Jeanelyn.

Madumduman nga wala na ang iban nga vital organs ni Jeanelyn sang nag-abot ang bangkay sini sa pungsod.

Samtang, bukas naman sa publiko ang haya sini sa Norala, South Cotabato.