KORONADAL CITY – Ginkumpirmar sang South Cotabato Police Provincial Police Office nga napatay sang mga otoridad sa ginpatigayon nga operasyon ang nagatindog nga leader sagn Dawlah Islamiya Group sa bahin sang Brgy. Lamsugod, Surallah, South Cotabato.


Sa eksklusibo nga interbyu sang Bombo Radyo Koronadal kay Police Provincial Director Col. Jemuel Siason, ginpahayag sini nga ginlikawan sang mga suspek ang checkpoint sa nasambit nga barangay gani ginlagas sila sang mga ini kag nagbaylohanay pa sang lupok kun sa diin naigo ang mga suspek.


Ginkilala sini ang mga napatay nga sanday Geoffrey Nilong alyas Abu Omar, lider sang Dawlah Islamiyah terror group; kag ang utod sini nga si Al-Amen Nilong, aktibo nga miyembro sang nasambit nga organisasyon.

Bodies of Dawlah Islamiyah terror group leader Geoffrey Nilong (Abu Omar) and his brother Al-Amen after an ensued firefight while refusing to be flagged down in checkpoint in Brgy. Lamsugod, Surallah, South Cotabato.


Narekober halin sa mga suspek ang mga components sa paghimo sang bomba kag ang gin-usar nga motorsiklo.


Dugang ni Siason, halin sa SPMS box sa probinsya sang Maguindanao ang mga suspek kag nag-agi sa T’boli, South Cotabato kag may plano kuntania ng mga ini nga magpadulong sa General Santos City agud didto magtuga sang kalakasan.


Nahibaloan nga naulamid sila sa mga serye sang pagpamomba sa Isulan, Sultan Kudarat; General Santos City; Davao City kag may papel man sa pagpadala sang bomba sa Marawi siege sadtong 2017.


Sa subong nagapadayon ang hot pursuit operations batok sa duha pa ka suspek nga nakapalagyo sa nasambit nga operasyon.