KORONADAL CITY – Hustisya ang ginasinggitan sang pamilya Agustin bangud sa pagkapatay sang ila himata nga si Pvt. John Agustin, isa sa mga miyembro sang 35th Infantry Division Philippine Army makaligad nga ginbawian sang kabuhi sa nagluntad nga twin bombing sa Brgy. Walled City sa Jolo, Sulu sang damlag lang.

Sa eksklusibo nga interbyu sang BomboRadyo Koronadal kay Liza “Bebeng” Agustin, iloy ni Pvt. John Agustin, ginpakigbahin sini nga sang nahibaloan sini nga kalakip ang iya bata sa mga biktima sang makangilidlis nga panghilitabo, daw madulaan suno pa ini sang animo bangud wala sini ginalauman nga magaabot sa punto nga hinali nga mapatay ang iya bata.

Dugang pa ni Nanay Bebeng nga sa kasamtangan, indi pa sini mahibaloan ang pagahimoon sa tion nga magaabot sa ila puloy-an ang bangkay sang bata sini bangud sadtong nakaligad nga mga inadlaw, nagpabatyag suno pa sa iya si Pvt. John Agustin.

Sa subong, ginapabakod nila ang ila kaugalingon halin sa kasakit kag kasubo nga nabatyagan bangud sa panghilitabo nga wala nila ginalauman.