KORONADAL CITY – Nagpanindugan ang alkalde sang Koronadal nga wala siya sang ginlapas sa mga layi agud pahalinon ini sa iya pwesto.

Ini makaligad ginpasakaan ini sang quo warranto petition kun sa diin nangin balasehan diri ang pila ka legal grounds.

Sa eksklusibo nga interbyu sang Bombo Radyo Koronadal kay Mayor Eliordo Ogena, gin-ako sini nga may yara siya sang gin-atubang nga kaso nga nangi rason sang pagkasuspender sini bilang abugado apang 2016 pa ini.

Dugang sa iya, nagadalagan pa lamang siya bilang bise-alkalde, wala sang sin-oman ang nagtilaw nga i-challenge ukon pamangkuton ang nasambit nga isyu.

Dugang pa sini nga wala nakapagkit sa local government code nga mangin ground for disqualification sa pagdalagan sini sa public office ang nasambit nga suspensyon sang korte suprema.

Panawagan man sini nga indi man dapat magkabalaka ang iya mga supporters labi na ang mga empleyado sang city government bangud magapreparar ini sang motion kag madamo nga legal remedies nga mahimo himoon kaangot sa nasambit nga kaso.

Apang suno kay Koronadal Vice Mayor Peter Miguel nga mismo nga petitioner sa nasambit nga petisyon, nga base naman sa husgado, wala suno pa sang kinamatarong nga magpungko bilang alkalde si Ogena bangud ‘convicted’ ini sa kaso nga administratibo.

Ginpabati-batian man ni Miguel ang nasambit nga alkalde kun sa diin kasubong suno pa ini nga diktador nga magdalagan sa posisyon apesar may kaso nga ginapangatubang.