KORONADAL CITY – Naglab-ot na sa kapin 16,000 ang mga apektado nga pamilya sa banwa sang Pikit, North Cotabato tuga sa malapnagon nga pagpanalasa sang tubig baha sa nakaligad nga mga adlaw.

Ini ang ginkumpirmar ni Engr. Arnulfo Villaruz, ang operations head sang Provincial Disaster Risk Reduction and Management Office-North Cotabato sa interbyu sang Bombo Radyo Koronadal.

Suno kay Villaruz, magluwas sa Pikit, masobra 2,000 pamilya man ang apektado sang pagbaha sa banwa sang Kabacan kun sa diin nadugangan sang 9 ka barangay ang apektado sang kalamidad.

Nagpaguwa man sang tubig ang Pulangi Hydroelectric Plant bangud puno na ini, rason nga nagsaka pa ang lebel sang tubig sa mga gindalasa nga lugar.

Samtang padayon sa gihapon ang search operations sa 44 anyos nga lalaki sa banwa sang Mlang makaligad ini nga gin-anod sang tubig-baha makaligad ginhana nga magtabok.

Nagapadayon sa gihapon ang ila rescue kag relief efforts kag pagpanagtag sang ayuda sa mga apektado nga mga residente nga nagapabilin subong sa mga evacuation centers.