KORONADAL CITY- Magkasubong nga pierde ang presidente kag bise presidente sang pungsod makaligad ang nagapadayon nga tensyon sa tunga sang mga ini nga nagresulta sa pagkakas ni Pres. Rodrigo Duterte kay Vice Pres. Leni Robredo bilang co-chairman sang Anti-illegal Drugs (ICAD).

Ini ang personal nga panan-awan sang isa ka Political Analyst kag History Professor nga si Julius Ubas sang Notre Dame of Marbel University kun sa diin ginpahayag sini nga negatibo ang epekto sini sa kampanya sang administrasyon batuk sa iligal nga droga.

Dugang pa dire nga indi lamang sa nangin performance sang bise presidente bilang co-chair sang ICAD nag-ugat ang problema apang posible bangud kabahin ini sang oposisyon kag isa man sa mga numero uno nga kritiko sang administrasyon.

Kaangot sini una naman ginpahayag sang presidente nga wala siya sang salig sa bise presidente apisar siya mismo ang nag appoint dire bilang drug czar.

Nagdugang pa ang kabalaka sang administrasyon sa hirit suno pa ni Robredo nga mahibaluan ang angot sa mga sensitibo nga datus sa war on drugs sa pihak nga ginpanginwala niya nga nagpangayo siya sang mga confidential nga mga impormasyon.

Kaangot sini wala man naluyagan sang administrasyon ang pakigsapol sini sa pila ka grupo nga kritiko man sang war on drugs campaign.

Kaangot sini, makaligad ang pagkakas sa bise presidente sa ICAD wala suno pa sang may nakabenepisyo sa tatlo ka semana nga kagarot sang mga ini kundi ang mga durugista gid lamang nga posible nalipay sa wala paghangpanay sang mga opisyal.

Sa baylo nga mag hugpong agud mapabaskog ang war on drugs campaign, nahatagan pa sang oportunidad ang mga durugista nga makita ang kahuyang sang gobyerno.