KORONADAL CITY – Nagpromisa ang Polomolok LGU nga gilayon nga pagabuligan ang pamilya sang isa ka suldado nga kalakip sa napatay sa makahalanusbo nga pagpamomba sa Brgy. Walled City, Jolo, Sulu.

Sa interbyu sang Bombo Radyo Koronadal kay Polomolok Mayor Honey Lumayag-Matti, ginpahayag sini nga ila pagahatagan sang ayuda ang nabilin nga pamilya ni Pvt. John Agustin sang 35th Infantry Battalion, Philippine Army.

Suno kay Mayor Lumayag-Matti, magluwas sa pagsabat sa covid-19 situation nga kasamtangan nga ginapangatubang sang ila banwa, pagahimoon man sang ila administrasyon ang tanan agud mahatagan sang pagkilala ang pagkabaganihan ni Pvt. Agustin.

Photo credits to the owner.

Kun madumdoman, yara sa 15 napatay samtang 75 naman ang pilason sa duha ka magkatuhay nga pagpamomba sa Brgy. Walled City.

Suno kay Lt. Col. Ronald Mateo, ang civil military relations officer sang 11th Infantry Division Philippine Army, ang una nga pagsigabong nga nagluntad takna alas-11:58 sang aga ang halin sang VBIED (vehicle-borne improvised explosive device).

Samtang ang ikaduha nga pagsigabong ang kahimoan suno pa sang isa ka babaye nga suicide bomber takna ala-1 sang hapon kun sa diin suno sa opisyal, yara sa pito ka suldado ang napatay kag 31 ang pilason.

Isa ka pulis naman ang killed in action samtang anom naman diri ang wounded in action, samtang anom ka sibilyan ang ginbawian sang kabuhi, 48 ang pilason kag 24 naman ang nakaguwa na sang ospital bangud sa minor injuries lamang nga naangkon.

Ginasiling nga Abu Sayyaf ang ginatudlo nga mastermind sa nasambit nga pagpamomba sa pagpanguna ni Mujin Sawadjaan.

Sa subong ginpaidalom sa total lockdown ang nasambit nga banwa sandig sa ginpaguwa nga ordinansa ni Mayor Kherkhar Tan agud hugot nga matutokan ang imbestigasyon kasunod sang natabo.