KORONADAL CITY – Ginpasiguro sang Philippine Army nga padayon ang ila paglagas sa mga katapo sang mga terorista nga grupo nga nagatuga sang kagamo, labi na sa area sang Mindanao.

Ini makaligad napatay sa nagluntad nga engkwentro sa tunga sang communist terror group (CTG) kag 90th Infantry Battalion sa Sitio Rudson, Brgy Arakan, Matalam, North Cotabato ang secretary suno pa sang nasambit nga komunista nga grupo.

Suno sa Philippine Army, ginkilala ang napatay nga suspek nga si Zaldy Gulmatico Polido alyas Joel ukon Cobra, kag secretary sang Guerilla Front 53 sang Southern Regional Command 3, Southern Mindanao Regional Committee.

Nagapatigayon sang combat clearing operations ang mga suldado sang makaengkwentro ang yara sa 20 ka miyembro sang CTG kun sa diin nagdugay sang 20 minutos ang engkwentro.

Deceased body of Zaldy Gulmatico Polido a.k.a Cobra (photo credits to 90th IB Phil Army)

Narekober kay Polido ang armas sini nga M16 rifle, mga magazine, mga cellphone, pagkaon, kag mga subersibo nga dokumento.

Kaangot sini, ginapangayo ni 6th Infantry Division Commander Major General Juvymax Uy ang bulig sang publiko agud matapna ang insurhensiya kag kalakasan nga tuga sang nasambit nga mga grupo sa ila nasakupan.