-- ADVERTISEMENT --

KORONADAL CITY – Naglab-ot sa halos 30 ka ektarya sang palay ang naguba sa isa ka barangay sa banwa sang Tantangan, South Cotabato tuga sang baha nga resulta naman sang tubtob mag-aga nga pagbubo sang ulan sa probinsiya.

Ini ang ginkumpirmar ni Tantangan Mayor Benjamin Figueroa sa interbyu sang Bombo Radyo Korondadal.

Suno sa alkalde, apektado sa subong ang mga mangunguma sa Purok Bayog kag Purok Acacia sang Brgy. New Iloilo sa nasambit nga banwa matapos nga nawasak ang kilid nga bahin sang isa ka dako nga suba kag nag-awas ang tubig baha padulong sa mga palay.

Sa pagkamatuod, tubtob sa subong may tubig pa sa nasambit nga mga lugar.

Nagalab-ot naman sa 120 ka mga puluy-an ang apektado sang baha kag mabudlay ang dalan sang mga ini.

-- ADVERTISEMENT --

Nahibaluan nga natalana na kuntani nga e-harvest sang mga mangunguma ang ila mga palay apang bangud sa kalamidad wala na sang may makuha pa nga produkto ang mga ini.

Sa subong, ginpatigayon na ang pagkay-o sa naguba nga kilid sang suba paagi sa “Bayanihan” samtang ginkay-o naman sang heavy equipment ang alagyan sang tubig agud indi na makaapekto sa mga residente sa liwat nga pagbubo sang mabaskog nga ulan.