-- ADVERTISEMENT --

KORONADAL CITY– Ginbawian sang kabuhi ang ginakabig nga spotter kag recruiter sang Dawlah Islamiyah terror group matapos ini nga maigo sang bala sa nagluntad nga engkwentro sa tunga sang mga ini kag otoridad sa banwa sang Polomolok, South Cotabato.

Ini ang ginpahayag ni Police Lt. Redin Cuevas, deputy chief of police sang Polomolok, South Cotabato sa interbyu sang Bombo Radyo Koronadal.

Suno kay Cuevas, ginreport sa ila nga nasiplaran sa bahin sang Rancho Buenaventura sa Brgy. Aflek, T’Boli ang target sang warrant of arrest nga sanday Esmael Sambial kasama ang lider nila nga si Zadee Nilong alyas Ali Boy Nilong kag yara sa 15 ka mga armado nga kalalakihan.

Sandig sa impormasyon sang Polomolok PNP, sang mahibaluan sang mga suspek ang presensiya sang mga otoridad nagpalagyo ang mga ini padulong sa Sitio Bio, Brgy Lapu kag nagbato sa mga otoridad tubtob nga nagdugay sang 10 ka minutos nga engkwentro.

Naigo si Sambial kag gindala sa hospital apang gindeklarar nga dead on arrival sang attending physician.

-- ADVERTISEMENT --

Narekober sa ginluntaran sang engkwentro ang kalibre 38 nga revolver, mga bala, pin sang granada, isa ka pakete sang ginapatihan nga shabu kag mga drug paraphernalia, mga ID kag personal nga kagamitan.

Samtang, gin-turn-over naman sa Provincial Explosive Ordnance Disposal Unit (PEOD) ang isa ka rifle grenade.

Nahibaluan nga si Sambial ang nagaserbe nga spotter sang Ali Boy Nilong terror group kag responsable sa pagrecruit sa Brgy. Basag sa Tboli kag sa iban pa nga barangay sa Polomolok.

Sa subong padayon nga ginapangita sang mga otoridad ang mga nakapalagyo nga kaupdanan sang mga suspek.