STO. NINO, SOUTH COTABATO – Ginkumpirmar sang bise alkalde sang Sto Nino, South Cotabato nga nakabaton sang pamahog sa kabuhi si Mayor Pablo Matinong antes ini nga ginluthang-patay sang mga suspek.

Ini ang ginbuyagyag ni Vice Mayor Sulpicio Villalobos sa interbyu sang Bombo Radyo Koronadal.

Suno kay Villalobos nga bayaw man sang ginpatay nga alkalde, nakabaton sang death threat si Matinong antes siya nga ginpatay kaina alas-8 sang aga samtang nagapatigayon sang inspeksiyon sa isa sa mga proyekto sini sa bahin sang Purok Libertad, Barangay Poblacion, Sto. Nino, South Cotabato kun diin napilasan pa ang isa sa mga testigo nga iya nga naistorya.

Sa subong nagapadayon ang pagpangita sa riding-in-tandem criminal nga nakuhaan man sang CCTV footage.

Samtang, ginpromisa naman sang bise alkalde nga ipadayon ang nasuguran ni Matinong sa pagpungko sini bilang alkalde sang nasambit nga banwa.