KORONADAL CITY – Hugot subong ang seguridad sa bug-os nga siyudad sang Tacurong mangin sa probinsya sang Sultan Kudarat makaligad nga ma-neutralize sang mga otoridad ang isa ka bomb courier.

Sa interbyu sang Bombo Radyo Koronadal kay Tacurong PNP chief of police Lt. Col. Rey Egos, nakabaton sila sang impormasyon nga may pasigabungon suno pa nga bomba sa probinsya gani gin-alerto ang tanan nga kapulisan sa mga checkpoint.

Takna alas 5:45 kaina sang aga kaina sa bahin sang Barrio Dos, Brgy EJC Montilla, ginpauntat sang mga otoridad ang isa ka lalaki nga sakay sa isa ka skeletal nga motorisklo apang sa baylo nga mag-untat, ginpadasigan pa sini ang iya nga dalagan rason nga ginlagas ini sang mga otoridad.

Ginpalupok sang suspek ang iya kalibre 45 nga armas luthang batok sa mga pulis rason nga nagbalos ang mga ini kag naigo ang suspek nga nangin kabangdanan sang iya kamatayon.

Narekober sa iya posesyon ang armas luthang, isa ka granada kag IED components nga nakasulod sa isa ka bag nga may unod nga bugas.

Nahibaloan nga nagikan ang suspek sa probinsya sang Maguindanao.

Sa subong ginahibalo sang mga otoridad ang pangalan sang napatay nga bomb courier samtang yara na sa punerarya na ang bangkay sini.

Kun madumdoman nga nadakpan sang mga kapulisan sang Tacurong PNP ang isa ka miyembro sang BIFF sang nakaligad nga semana kag ginaimbestigaran na nila kun may kaangtanan bala ang nasambit nga insidente sa pagkapatay sang courier.