KORONADAL CITY – Nagalaum si OWWA Administrator Hans Leo Cacdac nga mapanabat na ang employer ni Jeanelyn Villavende agud tigayon na nga maangkon sang pamilya Villavende ang ginahandom nga hustisya.

Ginhimo sang opisyal ang nasambit nga pahayag kadungan nga paglubong kay Jeanelyn kaina sang udto.

Suno kay Cacdac, kuntani mapasakaan na sang kaso sa korte ang babaye nga employer ni Jeanelyn agud maghatag ligwa sa hearing kag masilotan ini.

Ginpahayag man sini nga natalana nga sapulon ni DOLE Sec. Silvestre Bello III ang pamilya Villavende agud hisgotan ang mga tikang nga ila pagahimoon.

Ginaimbestigaran man sang Philippine Overseas Employment Administration (POEA) ang recruitment agency ni Villavende nga kasamtangan nga nakasuspinde kag ginalauman nga dako ang mangin salabton sini sa nadangtan sang napatay nga OFW.

Samtang ginatugyan na nila ang desisyon sang pamilya kaangot sa pagbaton sini sang blood money apang ginpaathag sang opisyal nga kinahanglan gihapon sila nga ubayan.

Ginpaathag sini nga kun pagabatunon sang pamilya ang igatanyag nga blood money nga nagabalor sang P59 million, madulaan sang bisa ang mga ginsang-at nga kaso sang pamilya batok sa employer sini.