KORONADAL CITY – Away sa duta ang ginalantaw nga motibo sang Lake Sebu PNP kaangot sa suno pa duelo nga natabo sa bahin sang Sitio Kuloingal, Barangay Lamfugon, Lake Sebu, South Cotabato nga ginkapatay sang duha ka persona.

Ginkilala ang nasambit nga mga biktima nga sanday Junie Mlaan, 32 anyos, mangunguma kag residente nasambit nga lugar; kag si Danilo Andal alyas Pee, 23 anyos nga residente naman sang Sitio Lambadak.

Suno kay Lake Sebu chief of police Major Johnnyrick Medel, gilayon nila nga ginresponderan ang ginluntaran sang insidente apang wala na sila sang naabtan didto magluwas na lamang ang duha ka persona nga wala na sang kabuhi.

Dugang sang opisyal, nakaangkon ang mga ini sang madamo nga igo sa ila lawas nga nangin kabangdanan sang ila kamatayon.

Ginakabig naman nga case closed ang nasambit nga insidente makaligad wala sang nakasaksi sa nasambit nga insidente kag wala man sila sang person of interest nga mahimo mapasakaan sang kaso.