KORONADAL CITY- Nagpasar sang resolusyon ang Provincial Disaster Risk Reduction and Management Council (PDRRMC) sang North Cotabato nga naga-awhag sa provincial board nga ipaidalom sa state of calamity ang probinsya.

Ini kasunod man sang nagsaka nga kaso sang dengue sa probisnya.

Sa interbyu sang Bombo Radyo Koronadal kay North Cotabato Integrated Provincial Health Officer Dr Eva Rabaya, nagb-ot na sa 4,583 ang kaso sang dengue sa probinsya humalin sang Enero 1, 2019 tubtob Hulyo 31, 2019 rason nga ini na sa karon ang yara sa “epidemic threshold”.

Mas mataas man suno pa ini sang 221% kun ikumparar sang nakaligad nga tuig sa kasubong nga period.

Sa nasambit suno pa nga numero, 16 na ang napagkit nga patay.

Kaangot sini, ginalauman na ang pagdeklarar sang Sangguniang Panlalawigan sang North Cotabato sang State of Calamity agud nga ma-usar ang 5% sa annual budget sini agud nga mapakigbatu-an ang pangdamo pa sang mga biktima sang dengue.

Nahibaluan nga una na nga nagdeklarar sang state of calamity ang mga banwa sang Banisilan kag Alamada sa nasambit nga probinsya.