KORONADAL CITY – Patay ang tatlo ka miyembro sang isa ka pamilya sa nagluntad nga insidente sang pagpamuno sa banwa sang Surallah, South Cotabato.

Suno kay Brgy. Canajay kapitan Rita Escorido sa interbyu sang Bombo Radyo Koronadal nga nagluntad suno pa ang krimen takna alas 6 ukon alas 7 kagab-i kun sa diin ginkilala ang mga biktima nga sanday Benedicto Calibayan, 53; asawa sini nga si Japellina, 51 anyos kag ang ila bata nga si Victoria, 15 anyos kag isa ka estudyante.

Base sa inisyal nga imbestigasyon sang mga otoridad, ginaaligar nga suspek sa nasambit nga insidente si John Jobert Dunis, 31 anyos kun sa diin gin-usaran niya ini sang gunting.

Nakaangkon ang mga biktima sang mga buno sa nagkalain-lain nga bahin sang ila lawas nga nangin tunaan sang ila kamatayon.

Gilayon naman nga ginsugid sang mga bata sang suspek ang natabo sa ila mga himata nga amo naman ang nag-alerto sa Surallah PNP.

Suno kay kapitan Escorido, nagapabilin nga at large ang nasambit nga suspek makaligad nagpalagyo matapos ginhimo ang krimen.

Ginasiling nga motibo sa paghimo sini sang pagmasaker amo ang pagpamalabag niya sa iya asawa nga magpadulong sa iban nga pungsod, rason nga na-target niya ang mga biktima sang iya kaakig.