KORONADAL CITY – Tuman na nga apektado ang transportasyon kag ekonomiya sa Hong Kong bangud sa wala-untat nga hublag protesta didto sang mga raliyesta.

Suno kay Bombo international correspondent Merly Bunda, 52 anyos, 29 tuig na nga OFW kag taga-Dingle, Iloilo, ginpakigbahin sini nga naglakat sila sang apat ka kilometro bangud paralisado ang mga biyahe sang bus, taxi kag tren bangud gin-okupar na ini sang mga raliyesta.

Nagalab-ot suno pa sa 230 nga transportation companies ang nagsuspinder sang ila operasyon.

Dugang ni Bunda, magapadayon suno pa ang hublag-protesta sang mga pumuluyo bangud wala sang kasigurohan kun igahatag bala ni Chief Executive Carrie Lam ang ginapangayo sang mga ini nga i-abolish ang extradition bill, magluwas pa ang panawagan sang mga ini nga magbiya na ini sa pwesto.

Sa subong, naghatag na suno pa sang abiso ang Konsulada sang Pilipinas sa mga OFWs sa Hong Kong kaangot sa mga lugar nga sentro sang mga protesta agud makalikaw sa kinagamo ang mga ini.