-- ADVERTISEMENT --

KORONADAL CITY – Ginpaidalom sa granular lockdown ang pila ka mga Sitio sang Brgy. Lower Maculan sa banwa sang Lake Sebu, South Cotabato matapos nga nagpositibo ang 8 ka myembro sang isa ka pamilya nga ginapatihan isa sa mga ini ang nagkadto sa bulangan.

Ini ang ginkumpirmar ni Mayor Floro Gandam sa interbyu sang Bombo Radyo Koronadal.

Suno kay Mayor Gandam, nagpaguwa ini sang Executive Order No. 5- 2021 nga nagapaidalom sa granular lockdown sang mga Sitio Bagong Silang, Silangan, Kaunlaran, Daisy kag Zone 3 tubtob sa Pebrero 7 sini nga tuig.

Ini ang nadesisyunan suno pa sang local IATF sang Lake Sebu makaligad ang pagsaka sang kaso sang covid-19 sa nasambit nga mga lugar.

Nahibaluan nga naglab-ot sa 69 ka mga pamilya halin sa nasambit nga barangay ang apektado nga ginadumilian maguwa sa ila panimalay sa sulod sang 5 ka adlaw.

-- ADVERTISEMENT --

Sa subong nagapadayon pa ang contact tracing ilabi na sa mga na-close contact sang mga nagpositibo agud nga mas mapadasig pa ang pagahimuon nga mga interbensyon angot sa mga nagdugang nga kaso sang covid-19 ilabi na sa mga pamilya nga nangin apektado.