KORONADAL CITY – Padayon nga ginaberipika sang mga kapulisan ang kaangtanan suno pa sang isa ka babaye nga negosyante nga ginluthang patay sa Arellano St., Brgy. Zone 3, Koronadal City.

Sa interbyu sang Bombo Radyo kay Koronadal PNP chief of police Lt. Col. Joefel Siason, ila nga ginahibalo kun may yara bala sang kaangtanan ang napatay nga biktima nga si Ruby Garcia, sa isa ka grupo sang isa ka organisado nga grupo sang mga scammers.

Ini bangud nahibaloan nga nadakpan ini sadtong Agosto 3 sa kaso nga estafa apang nakapiyansa.

Dugang pa ni Siason, posible nga personal grudge ukon robbery suno pa ang ila ginalantaw nga mga motibo makaligad ginkuha sang suspek ang bag sang biktima antes nagpalagyo.

Madumdoman nga manugpauli na kuntani si Garcia kaupod ang mister sini sa ila puloy-an sa Brgy. Carpenter Hill sang ginluthang ini sang gunman sa iya nga ulo nga nangin kabangdanan sang iya hinali nga kamatayon.

Sa subong ila nga ginahibalo kun sin-o ang suspek nga naghimo sang krimen kag ang direksyon nga ginsubay sang mga ini makaligad ginhimo ang pagpangluthang.