-- ADVERTISEMENT --

KORONADAL CITY – Nagapadayon sa karon ang imbestigasyon sang mga kapulisan sa nagluntad nga pagpangluthang sa isa ka Assistant Regional Director sang Department of Science and Technology (DOST) Region 12 sa siyudad sang Korondal kaina sang aga.

Ginkilala ang biktima nga si Normina Pahm, 55-anyos, kag kasamtangan nga Assistant Regional Director sang Department of Science and Technology (DOST) Region 12.

Suno kay Police Lt. Joedy Lito Guisinga, hepe sang Koronadal City PNP, naguwa sa ila imbestigasyon nga nagahular sang ila nga manugsugat kag nagapungko ang biktima kag 2 pa ka mga kaupdanan sini sa trabaho sa guwa sang ginaarkilahan nga apartment sa bahin sang 1st Block, Mabini Street, Barangay Zone 4 ,siyudad sang Koronadal.

Apang, hinali na lamang ini nga ginpalapitan sang wala pa nakilala nga suspek kag ginluthang sang makaduha ka beses kun diin naglakat lamang palayo ang suspek matapos himuon ang krimen nga daw kasubong nga wala sang may natabo.

Nakaangkon sang igo sang bala ang biktima sa natuo nga bahin sang kamot sini kag masuwerte naman nga wala nag-igo ang isa pa ka bala sa lawas sini.

-- ADVERTISEMENT --

Sa karon nagapaayo na sa hospital ang biktima matapos nga ginpaidalom sa operasyon samtang ginahibalo pa sang mga otoridad ang motibo sang krimen.

Ginpasalig man ni Guisingga nga may ginasundan na sila nga mga persons of interest nga may kahimuan sa krimen matapos nga nakuhaan man ang ini sang CCTV footage.