NORALA, SOUTH COTABATO – Tigayon na nga ginbawian sang kabuhi ang mag-amay nga Futolan nga mainit nga nag-inaway kun diin nagresulta sa isa ka makahalanusbo nga insidente sa Purok Sto. Niño, Brgy. BS Aquino, Norala, South Cotabato.

Sa interbyu sang Bombo Radyo Koronadal kay Police Maj. Nathaniel Panaguiton, hepe ng Norala PNP, ginkilala sini ang mag-amay nga sanday Isagani Futolan, 56 anyos kag Angelo Futolan, 30 nga lunsay mga residente sang nasambit nga lugar.

Sa imbestigasyon sang Norala PNP, naguwa nga nakaangkon sang mainit nga pagbaisay ang mag-amay nga nagresulta sa pagpanglabo sang bata nga si Angelo sa amay sini nga si Isagani.

Antes napatay ang amay, nakabalos pa ini sa iya bata paagi sa pagluthang usar ang 12 gauge shot gun apang wala na ini makakaluwas pa bangud sa malala nga pilas sa iya lawas.

Gindangat pa sa balay bululngan ang amay apang dead on arrival na ini samtang nadapatan pa sang bulong ang bata nga suspek apang tigayon naman nga ginbawian sang kabuhi sa Norala Municipal Hospital.

Ginapatihan nga hubog ang suspek sang pagbaisay nila sang iya amay rason nga nalabuan sini ang biktima.

Narekober naman sa crime scene ang isa ka basiyo sang bala, binangon nga gin-usar sang suspek sa pagpatay sa iya amay kag ang 12 gauge shotgun.