STO. NINO, SOUTH COTABATO – Nagapadayon ang maid-id nga imbestigasyon sang Sto Niño PNP makaligad nga ginluthang patay si Mayor Pablo “Abog” Matinong Jr.

Suno kay South Cotabato Provincial Police Office Director Col. Jemuel Siason sa eksklusibo nga interbyu sang Bombo Radyo Koronadal, ginbisita lamang ni Mayor Matinong ang isa ka concreting project sa Prk. Libertad, Brgy Poblacion sang ginluthang siya sang wala pa nakilal-an nga mga suspek nga ginapatihan nga riding in tandem.

Nakaangkon sang bala si Mayor Matinong sa mga vital parts sang iya lawas nga nangin rason sang iya hinali nga kamatayon.

Narekober sang SOCO sa crime scene ang pito ka basyo sang bala sang ginapatihan nga kalibre 45.

Dugang man ni Siason nga may ginbuyagyag s Mayor Matinong nga may nakagarot ini sa negosyo apang padayon pa nga ginahibalo ang matood nga motibo sa pagpangluthang.

Samtang indi naman makapati ang bug-os nga banwa sang Sto Niño makaligad nabalitaan ang masubo nga balita.

Madumdoman nga kalakip si Mayor Matinong sa mga local officials nga naulamid sa narcolist ni Pangulong Rodrigo Duterte, butang nga ginpanginwala naman sang opisyal.