KORONADAL CITY – Nabalaka sa karon ang pamilya Villavende sa sitwasyon sang abyan ni Jeanelyn sa pungsod Kuwait matapos nga wala na indi na ini makontak sa subong.

Ginkilala ang nasambit nga OFW nga si Roda Apolinar Magtulis nga residente sang Lebak, Sultan Kudarat kag kasamtangan nga nagatrabaho bilang Domestic Helper sa Kuwait.

Sa eksklusibo nga interbyu sang Bombo Radyo Koronadal kay Richard Padernal, tiyo ni Jeanelyn, ulihi niya nga naistorya paagi sa messenger si Roda sang Enero 5, 2020.

Suno kay Padernal, si Roda ang ginsugiran ni Jeanelyn sa ginhimo nga pagpangmaltrato sa iya sang mga employer sini kun diin sang Nobyembre 23, 2019 gintuad pa sini nga makapila siya ka beses nga ginlugos sang iya employer nga lalaki.

Antes pa man siya nga ginpatay sang iya nga employer nga babaye indi na maisip ang mga pagpanakit nga naagyan sini.

Makapila ka beses man nga naistorya ni Roda si Jeanelyn sa telepono kag nagahilibion ini nga nagahingyo sang bulig.

Dugang pa ni Padernal, siya mismo ang naghingyo sang bulig nga marescue si Roda kag nahibaluan na ini sang iya nga Agency kag sang Philippine Embassy.

Apang, sa subong indi na makontak pa si Roda kag nabalaka ang pamilya Villavende sa kun ano ang posible nga natabo sa iya.

Si Roda lamang ang mabakod nga testigo sa kaso ni Jeanelyn bangud siya ang nakahibalo sang tanan.

Nahibaluan nga isa man ka maltreated OFW sa Kuwait si Roda.